Í hátiðlegu og tilfinningaþrungnu andrúmslofti þann 8. maí 2026 hélt Serbneska menningarmiðstöðin á Íslandi upp á merkilegan áfanga – tíu ára afmæli sitt og farsælt starf á liðnum árum en serbneski móðurmálsskóli er hluti menningarmiðstöðvarinnar. Fjölmargir gestir, vinir miðstöðvarinnar, samstarfsaðilar, fulltrúar stofnana og meðlimir serbneska samfélagsins á Íslandi komu saman til að fagna þessum mikilvæga degi.
Hátíðardagskráin var sett af Danijelu Živojinović, formanni Serbnesku menningarmiðstöðvarinnar á Íslandi. Í ávarpi sínu rifjaði hún upp vegferð miðstöðvarinnar frá stofnun hennar til dagsins í dag og lagði áherslu á framlag allra þeirra sem hafa með vinnu sinni, eldmóði og stuðningi átt þátt í uppbyggingu hennar. Hún hvatti sérstaklega til samstöðu og samvinnu innan samfélagsins og undirstrikaði að aðeins með sameiginlegu átaki væri hægt að ná nýjum markmiðum og stuðla að áframhaldandi þróun miðstöðvarinnar. Jafnframt benti hún á mikilvægi þess sem þegar hefur áunnist og hvatti til áframhaldandi vinnu að nýjum verkefnum sem muni styrkja starfsemina enn frekar á komandi árum.
Gestir kvöldsins fengu tækifæri til að líta yfir sögu miðstöðvarinnar, upphaf hennar og fjölbreytt verkefni sem hafa á síðasta áratug stuðlað að varðveislu serbneskrar tungu, menningar, hefða og þjóðararfs í íslensku samfélagi.
Sérstakur heiður var að fá fulltrúa sendiráðs Lýðveldisins Serbíu í Osló til hátíðarinnar. Marijana Ognjanović, fyrsti ræðismaður og ráðgjafi sendiherra, ávarpaði gesti og lagði áherslu á mikilvægi starfs Serbnesku menningarmiðstöðvarinnar á Íslandi og framlag hennar til að viðhalda tengslum serbneska samfélagsins við heimaland sitt. Við þetta tækifæri afhentu Marijana Ognjanović og samstarfskona hennar, Jelena Tomić, miðstöðinni bókagjöf sem verður mikilvægt framlag til fyrirhugaðs bókasafns miðstöðvarinnar.
Sérstakan svip á hátíðina settu gestir frá serbneska félaginu „RAS“ í Osló. Þjóðdansahópur og þjóðlagasönghópur félagsins heilluðu áhorfendur með glæsilegri menningardagskrá. Með flutningi hefðbundinna dansa og þjóðlaga sýndu þau framúrskarandi færni, fagmennsku og djúpa virðingu fyrir serbneskri menningararfleifð. Framkoma þeirra var meðal eftirminnilegustu atriða kvöldsins og hlaut langvarandi lófatak frá ánægðum gestum.
Einnig voru kynnt verkefni Serbneska skólans, leikskólastarfs á serbnesku tungumáli og önnur verkefni sem miðstöðin hefur staðið fyrir á liðnum árum. Gestir fengu jafnframt innsýn í starf núverandi stjórnar og framtíðarsýn hennar.
Hátíðin fór fram með miklum glæsibrag og skipulag hennar var til fyrirmyndar. Gestir voru afar ánægðir með dagskrána og stemning kvöldsins einkenndist af stolti, samkennd og sterkum tengslum við serbneska menningu og hefðir.
Þessi tímamót eru ekki aðeins tilefni til að líta yfir farinn veg heldur einnig hvatning til nýrra verkefna og frekari uppbyggingar. Serbneska menningarmiðstöðin á Íslandi mun áfram vinna að því markmiði sínu að varðveita serbneska tungu, menningu og hefðir með sama eldmóði og staðfestu og einkennt hefur starf hennar undanfarinn áratug.
Við þökkum öllum sem tóku þátt í þessari hátíð og styðja áfram starf Serbnesku menningarmiðstöðvarinnar á Íslandi sem mikilvægan vettvang samveru, samstöðu og varðveislu menningararfs okkar.
