Meginmarkmið félagsins er að gefa tvítyngdum börnum tækifæri til að læra og viðhalda eigin móðurmáli og menningu. Rannsóknir hafa enda sýnt fram á að börn sem fá að læra tungumál foreldra sinna eiga auðveldara með að læra nýtt tungumál, í þessu tilfelli íslensku.

Móðurmál leitast við að styðja kennara félagsins, afla þekkingar á tvítyngi og hvetja foreldra sem eiga tvítyngd börn til að veita börnum sínum tækifæri til að kynnast eigin móðurmáli og menningu.

Verndari okkar er Vigdís Finnbogadóttir fyrrverandi forseti Íslands.

Þjóðahátið var haldin í Íþróttahúsi Hafnarfjarðar laugardaginn 2. júní s.l. Hátíðin tókst með miklum ágætum. Mjög margir lögðu leið sína á hátíðina og fjölmörg félög og samtök skráðu sig til þátttöku. Skemmtiatriði með fjölþjóðlegu sniði voru í boði allan daginn.

Sjálfboðaliðar og stjórn Móðurmáls þreytast ekki á að vekja athygli á því mikilvæga og góða starfi sem samtökin leggja af mörkum fyrir farsæla framtíð Íslands ár eftir ár. Móðurmálskennsla tvítyngdra barna er fjárfesting til framtíðar, fyrir börnin, fjölskyldur þeirra og samfélagið allt.